'Nge Steve 'Na Vota.....  (del Prof. Mimmo Nocera)
			pagina 1
	'Nge steve 'na vota 'nu paese: quatte case, tre cchiese, 'e viche e ciente giardine..... Me pare d'è vedè 'e garofane schiavune Che, capuzzianne, s'affacciavene 'e balcune. Sent' ancora addore d'è sciure arance che,  ammischiannese 'o ddoce d'abbrile, te rialavene 'nu surze 'e Paraviso.  E quanno 'a primavera schiuppava cchiù priputente, d'ò pizzo 'a Croce veneva 'o profumo d'e rrose avvellutate, che se squarciuniaveno pe' mmieze 'e gelsumine. Quanta pace, po', dint'à controra, quanno se sentiva sule 'a rota 'e 'na carretta,  e 'a vintunora, 'a voce d'ò 'mpagliasegge, Matalena cu 'o ratta-ratta,  Fila-Fila cu 'o ruoto 'e melecotte..... ''Mo cotte: aggio cacciate 'e pasticciotte!'' E c'addore spannevano 'e fasule 'e Ndunetta 'a tabaccara..... Po', quanno scenneva 'a sera, 'e pressa 'e pressa, 'e passere facevano l'urdemo 'ngiuce e se ne jevano 'a durmì. Era allora che dint''e cchiese 'e vicchiarelle mettevano 'a lengua 'o pulito e priaveno.... in latino! Ave Maria, grazia prena.... ps, ps, ps, ps,..... Parevano tanta vespe attuorno 'a 'nu grappolo d'uva; capevano poco o niente 'e chello che diceveno, ma 'o Pateterno nun è schizzinuso e l'accettava 'o stesso chelli preghiere! Quanno po' era 'o mese d'à Madonna, quanta nennelle facevano 'o fioretto pe' truvà 'o primm'ammore  o pe' se tenè cchiù stritto chillo che già 'e 'ncatenava!  Turnava 'a primmavera, e cu 'a primmavera turnaveno 'e viole; 'o viento, mariuole, s'arrubbava addore d'è giardine: s''a purtave a spasso p'ò paese e jeva scetanno 'e passion' antiche. Pure a don Ciccio s'arapeva 'o core e se vedeva 'nnante dduje nocchie nire e 'na faccele 'e cera. 'O pigliava 'a nostalgia E 'ntunava sottovoce: ''Rose, che belli rrose... e torna maggio...''. Eh, 'nge steve 'na vota.... 'nge steve.... mmiez'à piscina: 'o 'nguacchione, Mariannina 'a zingara, Peppeniello 'e mezalira, Aniello 'o baccalaiuolo, 'a mucella, Ndunetta 'e martella. E che triate! Quanta poesia 'nge mettevano pure dint''a 'na jastemma; ''Mario, core 'e mamma, tu 'e passà nu guaio niro!'': era Carmela 'e pettenessine, che teneva ll'anema 'e nu poeta!