'Nge Steve 'Na Vota.....  (del Prof. Mimmo Nocera)
			pagina 2
	E che poeta era Totonno 'o bugiardo! S'assettava sott'ò purtone e, chianu chian', attuorn''a isso, se faceva 'na trocchia 'e guagliuncielle. Cu 'a vocca aperta steveno a sentì cunte e fattarielle o storie che nun erano maje succiese. 'A fantasie se ne jeva 'e capa e Totonno cuntava, cuntava, cuntava.... e, 'ncuntrannese cu 'a fata Morgana, ddeve 'a vita a ciente suonne! E 'nge steveno 'e vvoce, voce 'e tutte 'e tiempe: ''A fava d'ò giardino, 'a fava fresca''. ''Puparuole d'ò sciummo, puparuò''. E se ne jeva p'è viche Peppeniello 'o parulano, nu poco sunnacchiuso, appuiannese 'a stanga d'à carretta. E s'ammiscavane addore cu 'e culore.... 'a vasinnicola se spusava cu 'a recata addirosa, 'a muzzarella faceva 'a cummara e 'a dint'o furno 'e Paccalone ascevano 'ntrionfo 'e meglie pizze Margherita. Dint'a cantina 'e Lionzio, 'o stocco 'a pizzaiuola azzenniava 'o baccalà 'ncassuola, 'a menesta 'mmarretata faceva 'a speciosa; puparuole fritte e fegatelle 'e puorco facevano 'e suppuorto 'o meglio vino asprinio. ''Pascaliniè, sàgliene 'n'atu carrale''. Quantu tiempo è passato? Addò stanne 'e sciacquante d'à cumpagnia 'e core cuntente? Giuvannine Ruggiero, Michele 'o fiumano, Luigi 'o mannese..... Quanta passione 'nge mettevano 'sti mast'è festa P'allummata 'e settembre, p'à meglia banda 'e musica: ''Filarmonica di Bari'', ''Gran Concerto Acquaviva delle Fonti'', ''Città di Squinzano'' .... E che te sapevano fa! 'nge credite? Mmiezo Rummo addiventava 'o salotto bbuono: 'nge mettevano segge e tavuline E fra 'nu piezzo e 'n'ato, se sfrennesiava don Armando cu 'a meglia limunata. E po' 'nge steva 'o ffuoco, 'o ffuoco d'è barbiere: funtane 'e luce scennevano d'ò cielo e, mentre t'allummaveno 'a notte, t'arapevano 'o core a 'na speranza. 'A dummeneca, po', già 'e primma matina, se sentiva addore d'ò ragù: cchiù tarde 'nge aveveno pippià mille purpette! 'N'aria d'alleria se spanneve pè ccase e l'alleria addeventava grossa quanno se scatenaveno 'e campane a gloria.