'Nge Steve 'Na Vota.....  (del Prof. Mimmo Nocera)
			pagina 3
	Asceva 'o ''vicchiariello'' a dint'a cchiesa;  'a gente curreva chiena è divozione A spannere lenzuole e cupertine d'è balcone....  Che tiempe!  Pure a puvertà teneve decoro!  Tante assapuraveno 'a famma, ma nun 'o deveno a vedè;  e quanno 'o Santo turnava e sparaveno 'a tracchiata,  'a dint'o vascio asceva Pascale 'o sapunare, che teneva 'na purpetta 'ncimma 'a 'na furchetta, e,  meravigliannese addimannava:  ''Ma che ghiè, nèh?  Ch'è succieso?''.  'Ati tiempe!  'A ggente s'accuntentava 'e poco e truvava 'o meglio spassatiempo quanno 'a sera,  abbasce 'e galesse, jeve a vedè l'opera d'è pupe dint'o casone 'e donn'Angelo 'e pappalone.  Quant'attenzione 'nge metteva Peppe 'o pupare a crià scene traggiche!  Scippava 'e llacreme pure 'e pprete 'a storia 'e Guido Santo.  E nun parlamme 'e quanno, cagnanne tiempo e scene, 'a storia se spustava dint'à sanità,  abbasci'o puorto, o dint'e Cristalline:  Carmeniello Malafergola, Tore 'e Crescienzo, Tatano Cappuccio appicciavano 'a fantasia d'è guaglione....  e tutte quante se sentivano 'nu poco malandrine.  Ati tiempe!  'Nge vuleva poco pè scatenà 'a passione: bastava che venesse 'o tiempo è l'elezzione!  Ma che ne vuò fa è ll'Orazzie e Curiazze!  'O paese se spaccava:  'a 'na parte 'e bbuone E all'ata parte 'e malamente  (mò và a vedè chi erano è bbuone e chi erano è fetienti!) e se ne senteveno giaculatorie!  'Nun mancava certo 'a fantasia 'a stu popolo squarciane: corachiatte e coreane facevano a chi metteva 'a coppa. E 'nge steve 'o Spenusiello che, novello menestrello, 'nge faceva 'e riturnelle.  S'appiccecaveno e s'è cantavano, se rumpeveno 'e matrimmonio e se mannaveno jastemme!  Quanta serenate a dispetto!  Addò stà cchiù chella passione?